कराड/प्रतिनिधी : -

श्री मळाईदेवी नागरी सहकारी पतसंस्थेच्यावतीने आयोजित ज्येष्ठ नागरिक दिनानिमित्त 1 ऑक्टोबर रोजी ज्येष्ठांचा सत्कार समारंभ मोठ्या उत्साहात पार पडला. या कार्यक्रमास मळाई ग्रुपचे संस्थापक अध्यक्ष शेतीमित्र अशोकराव थोरात, पतसंस्थेचे चेअरमन अजित थोरात, संस्थेचे संचालक शंकराव चांदे, तसेच आधार ज्येष्ठ नागरिक संघाचे अध्यक्ष भीमराव शेवाळे प्रमुख पाहुणे म्हणून उपस्थित होते.

कार्यक्रमाचे प्रास्ताविक भीमराव शेवाळे सर यांनी केले. यावेळी आधार ज्येष्ठ नागरिक संघ, मलकापूर शास्त्रीनगर येथील दादासो गरुड कदम, मच्छिंद्र अण्णा पाटील, भीमराव बापू शेवाळे, शांताराम ज्ञानदेव पाटील व तुकाराम दत्तात्रय पवार या पाच ज्येष्ठांचा सपत्नीक सत्कार करण्यात आला.

सत्काराला प्रत्युत्तर देताना दादासो कदम यांनी, ज्येष्ठांनी समाजात आपले स्थान कसे निर्माण करावे, यावर मार्गदर्शन केले. त्याचबरोबर नारायण गंधे, वामन अवसारे, रमेश कुलकर्णी, झुंजारराव झेंडे, अजित थोरात काका यांनीही शुभेच्छा देऊन मनोगत व्यक्त केले.

ज्येष्ठांना उद्देशून बोलतांना अशोकराव थोरात म्हणाले, सेवानिवृत्तीचा काळ कंटाळवाणा न वाटता आनंददायी व्हावा, यासाठी छंद जोपासले पाहिजेत, नातवंडांत वेळ घालवला पाहिजे, तसेच घरकामात यथाशक्ती हातभार लावून कुटुंबियांकडून प्रेम व आपुलकी मिळवली पाहिजे. 

या कार्यक्रमास जिजाऊ महिला संघाच्या उपाध्यक्षा शांता मुळे व सर्व सभासद, आधार ज्येष्ठ नागरिक संघाचे सभासद व सल्लागार मारुती रावते, सुनंदा मुळे, संस्थेचे सचिव सर्जेराव शिंदे उपस्थित होते. कार्यक्रमाचे सूत्रसंचालन पतसंस्थेच्या शाखाप्रमुख शर्मिला श्रीखंडे यांनी, तर हिंदुराव चव्हाण सरांनी आभार मानले.