वाठार स्टेशन :  प्रतिनिधी : कोरेगाव तालुक्यात एमआयडीसी मंजूर झाली असून ही एमआयडीसी उत्तर कोरेगाव तालुक्यातील काही भागात होणार असल्यामुळे हा प्रकल्प मंजूर झाल्यापासून मोठ्या प्रमाणावर या भागात पैसेवाल्या धन-दांडग्यांनी लक्ष घातल्याचे चित्र दिसून येत आहे याच माध्यमातून उत्तर कोरेगाव तालुक्यात एमआयडीसी मंजूर झाल्यापासून काही गावात या एमआयडीसीच्या विरोधात बैठका सुरू झाल्याचे चित्र दिसून येत आहे.
प्रामुख्याने उत्तर कोरेगाव तालुक्यातील मोठे गाव असणारे पिंपोडे बुद्रुक येथे एमआयडीसी विरोधात बैठका तसेच ग्रामसभा ही घेण्यात आली. याच माध्यमातून उत्तर कोरेगाव तालुक्यातील शेवटचे टोक असणाऱ्या सोळशी येथेही ग्रामस्थांचा एमआयडीसी विरोधात उद्रेक पाहावयास मिळत आहे तसे पाहिले तर दलालांच्या माध्यमातून शेतकऱ्यांच्या जमिनी हडप करण्याचे काम धनदांडग्या व नेतेमंडळी मोठ्या प्रमाणात करत असल्याचे चित्र देखील पहावयास मिळत आहे
या उत्तर कोरेगाव तालुक्यात होत असलेल्या एमआयडीसी विरोधात शिवसेना रस्त्यावर उतरणार असल्याचे शिवसेना कोरेगाव तालुकाप्रमुख संतोष सोळस्कर यांनी सांगितले ते पुढे म्हणाले शेतकऱ्यांच्या हितासाठी कायम कटिबद्ध असणारी शिवसेना या एमआयडीसी विरोधात सर्वात मोठा लढा उभारणार असून सरकारने जी एमआयडीसी या उत्तर कोरेगाव तालुक्यात मंजूर केलेली आहे व शेतकऱ्यांना देशोधडीला लावण्याचे काम हे आताचे सरकार करत असून यामध्ये राष्ट्रवादी काँग्रेस पक्षाची भूमिका संशयास्पद दिसत असून हात ओला तर मैतर भला अशी भूमिका राष्ट्रवादी घेत आहे. हे जोपर्यंत थांबणार नाही तो पर्यंत शिवसेना आपले उभे केलेले आंदोलन थांबवणार नाही यावर लवकरच गावोगावी बैठका घेऊन एमआयडीसीच्या वरिष्ठ अधिकाऱ्यांना पक्षप्रमुख मा. उद्धवजी ठाकरे, संपर्कनेते नितीन बानगुडे पाटील सर, उपजिल्हाप्रमुख अमोल आवळे यांच्या माध्यमातून भेटणार आहोत असेही कोरेगाव तालुकाप्रमुख संतोष सोळस्कर यांनी सांगितले.
              परंतु हा उभारलेला लढा कितपत यशस्वी होईल व सरकार अजून कोणता निर्णय घेईल हे पाहणे औसुक्याचे ठरणार आहे.