कराडच्या चावडीत...नुसताच धुर...!
कराड चावडीवरील सोनेरीचंदेरी झगमगाट संपूर्ण राज्याने पाहिला. हा झगमगाट सर्वदूर पसरला. चावडीचा कारभार चव्हाट्यावर आला. प्रमुखांनी वरिष्ठ दूत पाठवून सलग दोन-तीन दिवस तपास केला आणि झगमगाटाच्या चर्चेत सत्यता आढळल्याने अखेर चावडी प्रमुखास जाणवस घरी बोलावले. या घटनेचा वस्तुनिष्ठ घेतलेला कानोसा जशाचा तसा...
कराडच्या चावडीत...नुसताच धुर...
खुर्ची एक कारभारी दोन; एकाची रिंगणात रंगला खेळ
पराग शेणोलकर
कराड.
सोनेरीचंदेरी झगमगाटाच्या चर्चेचा कानोसा घेत कराडच्या चावडीप्रमुखाला वरिष्ठांनी जाणवस घराची राखण करण्याच्या सुचना केल्या होत्या. या सुचनांची गुंडाळी करणारा कागद कराडच्या चावडीप्रमुखाने वरतून आणला आणि त्यानंतर एक खुर्ची अन दोन कारभारी असा खेळ त्याठिकाणी सुरु झालाय. या प्रकरणात मैतराच्या हाकेला धावून जात अदृष्य हातांनी मदत केल्याच्या संशयावरुन जाणवस घरातील एका प्रमुख शाखेच्या प्रमुख कारभाऱ्याला देखील वरिष्ठांनी रिंगणात फिरायला लावल्याची चर्चा आहे.
करवीनिवासीचा आर्शिवाद घेवून मुंबापुरीच्या दिशेने निघालेल्या एका आलिशान बसमधील पांढऱ्या खोक्यांची माहिती मिळाल्याने कराडातील वर्दीवाल्यांनी शिताफिने, सापळा रचत, मिळालेल्या गोपनीय माहितीची पडताळणी केली. पांढऱ्या रंगाच्या खोक्यांची बस थांबवून घेत प्रवाशांना जागेवर सोडून ती चावडीत आणण्यात आली. तीन दिवस कसून आणि कानस घासून चंदेरीसोनेरीचा तपास सुरु होता. मोजणी झाली. चिटोरीतील नोंदीपेक्षा जास्त वजन असल्याचे समजल्यानंतर झाकापाकीची चर्चा सुरु झाली. अपेक्षेप्रमाणे झाकापाकी झाल्यानंतर 'तुझ्या गळ्या...माझ्या गळा...गुंफू मोत्यांच्या माळा', या ओळी आळवत चावडीतील प्रमुखांनी स्वत:सह इतरांच्या तोंडावर हात फिरवत अलाबला करत आळीमिळी गुप चिळीचे हुमाण घातले.
आळी...मिळी...गुप चिळीच्या या हुमाणानंतरही चंदेरीसोनेरी झगमगाटाची कुजबुज बाहेर पडली. कुजबुजीचा कानोसा घेतल्यानंतर भोपळ्यात बसलेल्या म्हातारीच्या गोष्टीची आठवण अनेकांना झाली. यानंतर कानोसा घेणाऱ्यांनी त्याचा डांगोरा पिटला. अन् चंदेरीसोनेरी चर्चा आणि झगमगाटाचा वेध वरिष्ठांनी कराडच्या चावडीवर ठिय्या ठोकला. खालूनवर वरून खाली चौकशीच्या फैरी झाडल्या. तीन दिस काथ्याकुठ झाला खुलासे मागितले. अन् मग काय चावडी प्रमुखाची पुरती तंतरली. काय करायचं असं म्हणतं डोकं खांजळण्याची वेळ आली. दोन तीन रात बसून लखोटा तयार केला आणि काळरात्रीला रथातून वरिष्ठांकडे दूत धाडला. मात्र त्याचा काय फायदा झाला नाही. वरिष्ठांनी थेट चावडीप्रमुखाला जाणवस घराच्या राखणीसाठी बोलावले.
चावडी प्रमुखाला हे आवाहन काय पटलं नाय. आजारपणात जात कराडचा चावडीप्रमुख थेट वरती गेला. त्याठिकाणाहुन एक खलिता आणत त्याने थेट चावडी गाठली. कराडच्या चावडीवर नव्या प्रमुखांनी खुर्ची धरून ठेवली. तिथल्या कारभाऱ्याला उठवत सुत्रे ताब्यात घेण्याची प्रक्रिया सुरु केली. या प्रक्रियेमुळे काही काळ चावडीत गोंधळ उडाला.
रेड्यांच्या टकरीत आपली कातडी सोलटाय नको म्हणून चावडीतील अनेकांनी खुष्कीचा मार्गाने पळ काढला. या गोंधळाची माहिती प्रभारीने जाणवस घराच्या प्रमुखास दिली, मात्र त्याने त्यास मान्यता दिली नाही. सध्या या चावडीत एक खुर्ची अन दोन कारभारी अशी स्थिती निर्माण झाली आहे.
आखले रिंगण.....?
जाणवस घराच्या राखणीला बोलावलेलेल्या जाणवस घरातील प्रमुख शाखेच्या प्रमुखाने अदृष्य मदत केल्याचे वरिष्ठांच्या कानावर आली. अन त्यांनी रिंगण आखून देत त्यात त्या प्रमुख शाखेच्या प्रमुखास चिपरी पाण्याचा खेळ खेळायला लावल्याची चर्चा सध्या वर्दीवाल्यांच्या गोटात आहे.
