पाटण : कोयना धरणात सध्याचा उपलब्ध पाणीसाठा, संपुष्टात येणारी साठवण क्षमता व आगामी दोन दिवसांत हवामान खात्याने वर्तविलेला ज्यादा पावसाचा अंदाज लक्षात घेता कोयना धरणाचे सहा वक्री दरवाजे रविवारी आणखी उचलून त्यातून ज्यादा पाणी पूर्वेकडे सोडले जाणार असल्याचे सूत्रांनी सांगितले. सध्या हे सहा दरवाजे दीड फुटांवर स्थिर ठेवले आहेत.  धरणाच्या दरवाजातून 9,596 व पायथा वीजगृहातून वीजनिर्मिती करून 2,100 असे एकूण पूर्वेकडे कोयना नदीपात्रात प्रतिसेकंद 11,696 क्यूसेक पाणी सोडल्याची माहिती धरण व्यवस्थापनाने दिली आहे. मुळातच धरणातून सोडलेल्या पाण्यामुळे कोयना नदी पाणीपातळीत मोठ्या प्रमाणावर वाढ झाली आहे.  आता याहूनही जादा पाणी सोडल्यानंतर नदीच्या पाणी पातळीत आणखी मोठी वाढ होणार असल्याने नदीकाठच्या गावांना सावधानतेचा इशारा दिला आहे  105.25 टी.एम.सी. पाणी साठवण क्षमता असलेल्या कोयना धरणातील उपलब्ध पाणीसाठा, पाणी सामावून घेण्याची क्षमता, आगामी काळातील पाऊस, सध्याची पाणी आवक, पूर्वेकडे कोयना व कृष्णा नदीपात्रात पाणी सामावून घेण्याची क्षमता व पूर्वेकडे संभाव्य महापूराची तीव्रता कमी करण्यासाठी शुक्रवारी धरणाचे दरवाजे दीड फुटांनी उचलून त्यातून व पायथा वीजगृहातून वीजनिर्मिती करून पूर्वेकडे कोयना नदीपात्रात पाणी सोडले आहे. धरणातील पाणीसाठा वाढल्याने आता दीड फुटाच्या दरवाजातूनही जादा पाणी विसर्ग होत आहे .  शुक्रवारी सायंकाळी पाच ते शनिवारी सायंकाळी पाच या चोवीस तासांतील पाऊस पुढीलप्रमाणे कोयना 94 मि.मी., नवजा 119 मि.मी. व महाबळेश्‍वर 160 मि.मी. पावसाची नोंद झाली आहे . धरणाची स्थिती एकूण पाणीसाठा 92.59 टी.एम. सी., उपयुक्‍त पाणीसाठा 87.59 टी. एम.सी., पाणीउंची 2153.8 फूट , जलपातळी 656.438 मीटर इतकी झाली आहे . 105.25 टीएमसी पाणी साठवण क्षमता असलेल्या या धरणाला पूर्ण क्षमतेने भरण्यासाठी यापुढे 12.66 टीएमसी पाण्याची गरज आहे . गेल्या चोवीस तासांत धरणातील पाणीसाठ्यात 3.62 टीएमसीने तर पाणीउंचीत 2.10 फूट वाढ झाली आहे